Ndeshja e parë e play-offit për Ligën e Kampionëve mes Egnatias dhe Petrocubit përfundoi me barazim 1-1 në stadiumin “Zimbru” të Moldavisë. Petrocub kaloi i pari në avantazh që në sekondat e para të ndeshjes, falë golit të Popescut pas një gabimi të portierit Dajsinani. Egnatia arriti të barazojë në minutën e 35-të me golin e Altin Kryeziut, por pak minuta para përfundimit të pjesës së parë mbeti me një lojtar më pak pas kartonit të kuq të kapitenit Aleksit, i cili u ndëshkua për një ndërhyrje të rrezikshme pas rishikimit me VAR.