Egnatia do të luajë sot në Rrogozhinë ndeshjen e parë të raundit të dytë kualifikues në Champions League kundër NK Celjes, një skuadër e fortë nga Sllovenia. Koeficientët tregojnë se vendasit nuk janë favoritë, me kuotën për fitore të Egnatias në 3.70, ndërsa avantazhi i lehtë i jepet ekipit slloven me kuotë 1.80. Atmosfera në kampin e rrogozhinasve është entuziaste dhe e mbushur me dëshirën për të dhuruar një performancë të mirë dhe për të arritur një rezultat pozitiv që do t’i jepte forcë për ndeshjen e kthimit në Slloveni. Pas suksesit ndaj Petrocubit në raundin e parë, Egnatia kërkon të shkaktojë surprizën dhe të vazhdojë rrugëtimin në këtë kompeticion elitar.