Faton Seferi, biznesmeni kosovar, ka dhënë dorëheqje me efekt të menjëhershëm nga posti i nënkryetarit të FC Drenicës dhe është tërhequr nga marrëveshja për privatizimin dhe zhvillimin e klubit. Në një letër të gjatë dhe emocionale, ai shpjegon se vendimi erdhi pas një viti të mbushur me sakrifica, përkushtim dhe zhgënjime, për shkak të problemeve financiare të mëdha dhe mungesës së mbështetjes së nevojshme nga partnerët dhe institucionet. Seferi thekson se investoi edhe mjete personale për të mbajtur klubin në funksion, por sfidat ligjore dhe financiare e bënë të pamundur vazhdimin e projektit. Ai falenderon të gjithë ata që e mbështetën gjatë këtij rrugëtimi dhe shpreh shpresën që vizioni për FC Drenicën do të vazhdojë nga të tjerët, duke theksuar se klubi do të mbetet gjithmonë pjesë e zemrës së tij.