Federata e Basketbollit e Kosovës (FBK) ka reaguar ashpër ndaj sjelljeve të shikuesve gjatë dy ndeshjeve të para gjysmëfinale të plejofit mes Pejës dhe Trepçës, të zhvilluara në Pejë dhe Mitrovicë. Në këto ndeshje janë konstatuar fyerje të organizuara në kor nga tribunat ndaj lojtarëve, si dhe përdorimi i mjeteve të zërimit të palestrës për përçimin e mesazheve fyese, veçanërisht në ndeshjen në Pejë, pavarësisht paralajmërimeve zyrtare gjatë takimit. FBK-ja e ka cilësuar këtë sjellje si shkelje të rëndë të parimeve të respektit, integritetit dhe fair-play, duke theksuar se nuk do të tolerojë një praktikë të tillë në asnjë rrethanë. Si pasojë, Federata ka ndërmarrë masa disiplinore në përputhje me rregulloret në fuqi për të adresuar këto sjellje.