Fenerbahçe ka bërë prioritet transferimin e sulmuesit kosovar Fisnik Asllani në afatin kalimtar të verës, duke insistuar për këtë lëvizje edhe pse nuk do të jetë e lehtë. Asllani, i cili ka kontratë me Hoffenheimin deri në vitin 2029 dhe një klauzolë lirimi prej 30 milionë eurosh, ka tërhequr interesin e klubeve të mëdha si Barcelona, Chelsea, Bayern Munchen dhe Borussia Dortmund. Fenerbahçe po kërkon të bindë Asllanin të transferohet në Turqi duke përdorur ndikimin e Vedat Muriqit, sulmuesit kosovar që luan me Asllanin te Kombëtarja dhe që ka kaluar më parë në këtë klub turk. Klubi turk kishte tentuar transferimin e Asllanit edhe gjatë afatit të janarit, por pa sukses, ndërsa tani po përpiqet sërish ta realizojë këtë objektiv.