Federata e Futbollit e Kosovës ka njoftuar se gjatë pushimeve verore Kampi Nacional në Hajvali do të jetë i hapur për të gjithë futbollistët dhe futbollistet nga diaspora, pa marrë parasysh ligën ku aktivizohen apo kombëtaren që përfaqësojnë. Qëllimi i kësaj nisme është ofrimi i kushteve profesionale për stërvitje gjatë qëndrimit në Kosovë dhe forcimi i lidhjeve të tyre me futbollin vendor. Të interesuarit mund të rezervojnë terminet duke dërguar kërkesë në adresën e Federatës, duke specifikuar datat, orarin, numrin e pjesëmarrësve dhe vitin e lindjes. Për grupet me më shumë se pesë pjesëmarrës, FFK do të sigurojë edhe mbështetje profesionale nga trajnerët, në përputhje me kapacitetet dhe orarin e Kampit Nacional.