Kryetari i Federatës së Futbollit të Kosovës, Agim Ademi, u takua me kryetarin e komunës së Mitrovicës, Faton Peci, për të diskutuar nevojën për ndërtimin e fushave të reja të futbollit dhe përshpejtimin e punimeve në stadiumin “Adem Jashari”. Ademi theksoi rëndësinë e finalizimit të rinovimit të stadiumit, i cili është në proces prej disa vitesh dhe duhet të licencohet nga UEFA si stadium i kategorisë së katërt, për të shmangur zhvendosjen e garave jashtë vendit. Ai kërkoi nga Ministria e Sportit dhe të gjithë të përfshirët që të mos ketë vonesa dhe neglizhencë në këtë projekt, duke theksuar se aktualisht Kosova operon vetëm me një stadium për garat evropiane. Gjithashtu, u diskutua edhe për kalimin e objektit sportiv “Fatime Xhaka” në shfrytëzim të FFK-së dhe vendosjen e selisë së Lidhjes Rajonale të Futbollit të Mitrovicës aty, si dhe për ndërhyrje në stadiumin “Riza Lushta” dhe ndërtimin e një fushe stërvitore në këtë regjion.