Federata e Futbollit të Maqedonisë ka dënuar klubin Vardar me një gjobë prej 5000 euro dhe ndalesë të prezencës së publikut në një ndeshje si pasojë e brohoritjeve raciste dhe nacionaliste nga tifozët “Komiti” gjatë ndeshjes me Bashkimin. Vendimi u mor në një seancë të jashtëzakonshme të komisionit disiplinor, ku u konstatua organizim i dobët i ndeshjes dhe përdorim i mjeteve piroteknike nga tifozët. Ministria e Punëve të Brendshme ka konfirmuar kryerjen e veprës penale për dhunë dhe sjellje të pahijshme në ndeshje sportive dhe ka paralajmëruar sanksione individuale me gjoba për personat fizikë dhe klubin, por nuk ka bërë të ditur nëse janë identifikuar autorët e brohoritjeve fyese. Zv.kryeministri Arben Fetai ka bërë thirrje për reagim profesional dhe shqiptime të sanksioneve të nevojshme nga Federata dhe organet kompetente për të parandaluar përsëritjen e rasteve të tilla.