Akademia e FIFA-s në Kosovë ka filluar një program intensiv stërvitor me 19 vajza të talentuara, të përzgjedhura nga të gjitha Lidhjet Rajonale të Futbollit në vend. Këto vajza, pjesë e gjeneratave 2012 dhe 2013, janë identifikuar pas një procesi të gjerë vëzhgimi në të gjitha rajonet e Kosovës gjatë muajit qershor. Programi zhvillohet në kuadër të FIFA Talent Development Scheme dhe synon të ofrojë mundësi të barabarta zhvillimi, duke përgatitur futbollistet për nivelet më të larta të sportit. Nën drejtimin e ekspertit të FIFA-s, Rainer Kraft, vajzat do të ndjekin stërvitje të specializuara për të përmirësuar aspektet teknike, taktike dhe fizike, me qëllim krijimin e një baze të fortë për futbollistet e ardhshme të Kosovës.