Federata Ndërkombëtare e Futbollit (FIFA) ka theksuar disa duele individuale kyçe në gjysmëfinalet e plejofit evropian për kualifikim në Kupën e Botës 2026, duke veçuar sidomos përballjen mes sulmuesit kosovar Vedat Muriqi dhe mbrojtësit sllovak David Hancko në ndeshjen Sllovaki – Kosovë. Hancko, i shpallur lojtari më i mirë i Sllovakisë për vitin 2025 dhe pjesë e Atletico Madridit, njihet për kujdesin taktik dhe qetësinë në lojë, duke luajtur si mbrojtës qendre dhe i majtë. Muriqi, gjithashtu aktiv në La Liga me Mallorcan, ka shënuar 18 gola në elitën spanjolle këtë sezon, një shifër që e kalon vetëm Kylian Mbappe. FIFA ka përmendur edhe duelin tjetër të rëndësishëm mes Robert Lewandowskit dhe Berat Gjimshitit në ndeshjen Poloni – Shqipëri, duke theksuar rëndësinë e këtyre përballjeve për rrjedhën e takimeve dhe kualifikimin në Botëror.