Federata e Futbollit e Kosovës ka inauguruar zyrtarisht “FIFA Talent Academy Kosova”, një projekt i përbashkët me FIFA-n që synon identifikimin dhe zhvillimin e talenteve të reja në futboll. Ceremonia e hapjes mblodhi figura të rëndësishme të futbollit kosovar, përfaqësues të FIFA-s dhe institucioneve vendore, duke shënuar një moment të rëndësishëm për sportin në vend. Arsene Wenger, Shefi i Zhvillimit Global të Futbollit në FIFA, i dërgoi FFK-së një letër falënderimi dhe vlerësimi për përkushtimin dhe bashkëpunimin në realizimin e këtij projekti. Ai theksoi rëndësinë e kësaj nisme për avancimin e futbollit në Kosovë dhe shprehu gatishmërinë për të forcuar më tej partneritetin në të ardhmen.