Finalja e Kupës së Kosovës në futboll do të zhvillohet më 21 maj në stadiumin “Fadil Vokrri” në Prishtinë, me fillim nga ora 20:00, ku do të përballen FC Ferizaj dhe FC Dukagjini. Në një short të mbajtur të martën në prani të Komisionit të Garave dhe përfaqësuesve të të dy klubeve, është përcaktuar që FC Ferizaj do të ketë statusin e ekipit vendas në këtë ndeshje finale. Kjo i jep Ferizajt të drejtën e zgjedhjes së fanellave në rast të përputhjes së ngjyrave, si dhe vendosjen në bankinën dhe anën e stadiumit të përcaktuar për ekipin vendas sipas rregullores së garave. Të dy skuadrat do të paraqiten për herën e katërt në finalen e Kupës së Kosovës, duke synuar fitimin e trofeut për herë të parë në historinë e tyre.