Sot në një ceremoni shtetërore në orën 18:00, do të dorëzohet flamuri ekipit të Kosovës që do të marrë pjesë në Lojërat Mesdhetare “Taranto 2026”. Në këtë ngjarje do të marrin pjesë 163 sportistë kosovarë, 87 meshkuj dhe 76 femra, që do të garojnë në 21 sporte të ndryshme. Për herë të parë, Kosova do të përfaqësohet edhe në katër sporte ekipore: futboll, volejboll, hendboll dhe basketboll 3x3. Me një delegacion rekord dhe pjesëmarrje të gjerë, Kosova synon të vazhdojë sukseset e mëparshme, ku në dy edicionet e kaluara ka fituar 10 medalje, kryesisht në xhudo dhe boks.