Bordi i Federatës së Hendbollit të Kosovës ka pranuar dorëheqjen e Agron Shabanit nga posti i përzgjedhësit të Kombëtares A të femrave, duke i dhënë fund një periudhe më shumë se tetëvjeçare në krye të ekipit. Gjatë drejtimit të tij, Kosova ka arritur sukseset më të mëdha në historinë e hendbollit, duke avancuar në kualifikimet për Kampionatin Evropian dhe duke kaluar dy herë fazën e parë kualifikuese për Kupën e Botës. Fitoret ndaj ekipeve si Belgjika, Bosnjë-Hercegovina, Qiproja dhe Luksemburgu, si dhe ndeshjet e forta me superfuqitë e hendbollit, mbeten momente të paharrueshme. Federata ka falënderuar Shabanin për kontributin e tij të çmuar në zhvillimin dhe stabilizimin e hendbollit kosovar përgjatë këtyre viteve.