Komiteti Ekzekutiv i Federatës Shqiptare të Futbollit ka miratuar një rregull të ri që detyron aktivizimin e lojtarëve të rinj në kampionatet kombëtare, duke filluar nga sezoni 2026–2027. Sipas këtij vendimi, në Superiore dhe Kupën e Shqipërisë çdo skuadër duhet të aktivizojë nga minuta e parë të paktën një futbollist të datëlindjes 2007 e më i ri me pasaportë shqiptare, ndërsa në kategoritë e tjera ky lojtar duhet të qëndrojë në fushë gjatë gjithë ndeshjes. Në rast zëvendësimi, futbollisti i ri duhet të zëvendësohet me një tjetër që plotëson të njëjtat kritere, përndryshe skuadra luan me një lojtar më pak për periudhën e detyrueshme. Ky rregull synon të rrisë konkurrencën dhe të krijojë një model të qëndrueshëm zhvillimi për futbollin shqiptar në dekadën e ardhshme.