Një ditë para ndeshjes së rëndësishme të Kosovës ndaj Sllovakisë në Bratislavë, Hoffenheimi ka publikuar një shkrim dhe intervistë me tre futbollistët e tij kosovarë, Fisnik Asllani, Leon Avdullahu dhe Albian Hajdari. Klubi gjerman i konsideron ata si “bërthamën kosovare” që mbështet skuadrën që nga gushti i vitit 2025 dhe thekson rëndësinë e tyre si shtylla të ekipit dhe përfaqësues të Kosovës. Në intervistë, lojtarët flasin për dallimet kulturore mes tyre, duke i përshkruar veten me epitetet që lidhen me origjinat e tyre: Hajdari si përfaqësues i Ballkanit, Avdullahu si zviceran dhe Asllani si gjerman, duke theksuar karakteristikat e tyre të ndryshme në sjellje dhe komunikim. Ata shprehin gjithashtu ëndrrat e tyre për të luajtur me Kosovën në Kampionatin Evropian dhe Botëror, si dhe për të arritur suksese me Hoffenheimin në Ligën e Kampionëve në sezonin e ardhshëm.