Sulmuesi i Kombëtares shqiptare, Indrit Tuci, shënoi golin e epërsisë për skuadrën e tij Kayserispor në minutën e 60-të të ndeshjes kundër Eyupsporit në Superligën turke. Goli i tij ishte i treti në këtë sezon për sulmuesin dhe erdhi pas një kohe të gjatë pa shënuar. Megjithatë, përpjekjet e Tucit nuk mjaftuan që Kayserispori të marrë fitoren, pasi ndeshja përfundoi në barazim 1-1. Ky rezultat lë Kayserisporin në vendin e parafundit me vetëm 27 pikë, duke rrezikuar rënien në Kategorinë e Dytë të futbollit turk.