Interi, lider aktual në Serie A me 68 pikë, ka lëshuar përsëri pikë në garën për titull duke barazuar 1:1 në shtëpi ndaj Atalantës në xhiron e 29-të. Pas disfatës në derbi ndaj Milanit, Interi shënoi i pari me Francesco Pio Espositon në minutën e 26-të, por malaziasi Nikola Krstoviq barazoi për Atalantën në minutat e fundit të ndeshjes. Në momentin e golit të barazimit pati tensione dhe pretendime nga ana e Interit për ndërhyrje të palejuar ndaj Denzel Dumfriesit. Atalanta, që po lufton për një vend në kupat evropiane, mbetet në pozitën e shtatë me 47 pikë, ndërsa Milani i dyti me 60 pikë ka ende një ndeshje më pak për të luajtur.