KB Sigal Prishtina ka njoftuar të hënën tërheqjen e saj nga gara në Ligën ENBL për shkak të obligimeve financiare dhe administrative të papërmbushura, të cilat janë krijuar nga kryesia e kaluar e klubit. Përpjekjet e drejtuesve aktualë për të gjetur zgjidhje nuk kanë qenë të mjaftueshme, duke bërë të pamundur vazhdimin e pjesëmarrjes në këtë kompeticion. Klubi ka vendosur që në këtë periudhë të përqendrohet në garat vendore dhe në stabilizimin e skuadrës, e cila po kalon një krizë rezultatesh në Superligën e Kosovës, ku aktualisht zë vendin e gjashtë me nëntë fitore dhe 14 humbje. Në njoftim, Prishtina falënderon Ligën ENBL për bashkëpunimin dhe mirëkuptimin, duke theksuar përkushtimin për rikthimin e stabilitetit dhe rezultateve që i takojnë historisë së klubit.