Kombëtarja e Kosovës në hendboll ka zhvilluar dy seanca stërvitore intensive në Pallatin e Rinisë në Prishtinë, ku shtabi teknik nën drejtimin e përzgjedhësit Jesper Ostlund ka punuar në taktika sulmi dhe mbrojtjeje. Atmosfera në ekip është shumë pozitive dhe lojtarët janë të përkushtuar për të dhënë maksimumin para udhëtimit drejt Tuzëllit të Bosnjë-Hercegovinës. Ekipi do të niset të mërkurën në mëngjes për në Tuzëll, ku do të zhvillojë përgatitje të mëtejshme para ndeshjes së parë të raundit të dytë kualifikues për Kampionatin Botëror 2027, që do të luhet të enjten në orën 20:00. Ndeshja e kthimit do të zhvillohet të dielën në Prishtinë, ndërsa shtabi teknik shpreh kënaqësi për angazhimin e lojtarëve dhe optimizëm për rezultatet e ardhshme.