Në prag të ndeshjes së shumëpritur ndërmjet Kosovës dhe Turqisë në stadiumin Fadil Vokrri, 12 komuna të Kosovës kanë konfirmuar organizimin e transmetimeve publike në sheshe dhe ambiente të përbashkëta për qytetarët. Në qytete si Ferizaj, Drenas, Gjilan, Deçan, Junik, Kaçanik dhe Kamenicë janë vendosur ekrane të mëdhenj për ndjekjen e ndeshjes, ndërsa edhe Prizreni, Vushtrria, Mitrovica, Obiliqi dhe Prishtina kanë konfirmuar organizime të ngjashme. Në disa komuna si Dragash, Hani i Elezit, Podujevë, Rahovec dhe Malishevë nuk ka organizime, ndërsa në Pejë dhe Istog organizimi varet nga kushtet atmosferike. Kryetari i Prishtinës, Përparim Rama, ka ftuar kryetarët e komunave të vendosin ekrane të mëdha në sheshet e qyteteve për të krijuar një atmosferë mbështetëse dhe ka njoftuar rregullimin e linjës së autobusit Aeroport – Prishtinë për të lehtësuar qarkullimin e tifozëve.