Kombëtarja e Kosovës pritet të zhvillojë në muajin qershor të paktën dy ndeshje miqësore në kuadër të datave të lira të FIFA-s, ndër të cilat njëra mund të jetë kundër Polonisë. Federata e Futbollit të Kosovës ende nuk ka konfirmuar kundërshtarët, por mediumet polake raportojnë se Polonia ka të konfirmuar miqësoren me Nigerinë më 3 qershor dhe po zhvillon bisedime për një ndeshje të dytë me Kosovën. Kjo përballje do të ishte historike, pasi do të ishte hera e parë që këto dy kombëtare takohen në fushë, dhe pritet të zhvillohet në një nga qytetet kryesore polake si Varshava, Gdansk, Wroclawi, Poznani apo Chorzow. Të dyja kombëtaret nuk arritën të kualifikohen për në Kampionatin Botëror 2026, pasi u mposhtën në finalet e “play-off”-it nga Turqia (Kosova) dhe Suedia (Polonia).