Për herë të parë në historinë e sportit paralimpik, Kosova po përfaqësohet në IBSA Judo Grand Prix në Astana të Kazakistanit, një nga garat më prestigjioze botërore për xhudistët me aftësi të kufizuara në të pamur. Xhudisti Ardian Sopa, i cili ka nisur karrierën e tij në vitin 2023, po përballet me një konkurrencë të fortë në kategorinë e tij, ku marrin pjesë 14 sportistë me përvojë të gjatë. Ky debutim është vlerësuar si një arritje e madhe nga Komiteti Paralimpik i Kosovës dhe konsiderohet një hap i rëndësishëm për promovimin dhe fuqizimin e sportistëve paralimpikë kosovarë në arenën ndërkombëtare. Ardian Sopa shoqërohet nga trajneri Anton Cena, i përkushtuar prej vitesh në zhvillimin e tij profesional, ndërsa kjo pjesëmarrje shënon edhe fillimin e grumbullimit të pikëve kualifikuese për Lojërat Paralimpike Verore 2028 në SHBA.