Përfaqësuesja e vajzave e Kosovës në hendboll përballet sot në një ndeshje vendimtare ndaj Finlandës në Pallatin e Rinisë dhe Sportit në Prishtinë, në kuadër të kualifikuesve për Women’s EHF EURO 2026. Ndeshja nis në ora 17:15 dhe është pjesë e fazës së dytë dhe të fundit kualifikuese, ku Kosova kërkon fitore me të paktën tri gola diferencë për të kaluar Finlandën në renditje. Në ndeshjen e parë të zhvilluar në Finlandë, Kosova u mund me rezultat 23:21, por ekipi mbetet i motivuar dhe i fokusuar për të treguar karakter dhe për të përmirësuar paraqitjen. Selektori Agron Shabani ka ftuar tifozët të mbështesin ekipin nga tribunat, duke theksuar se përkrahja e tyre mund të jetë një forcë shtesë në këtë duel me cilësi të barabartë mes dy përfaqësueseve.