Kombëtarja U17 e volejbollit për vajza e Kosovës përfundoi paraqitjen në Kampionatin Ballkanik me një fitore të thellë 3:0 ndaj Moldavisë. Dy setet e para u dominuan qartë nga vajzat kosovare me shifra 25:10 dhe 25:13, ndërsa seti i tretë u karakterizua nga një rivalitet i fortë dhe luftë e barabartë në fushë. Megjithatë, Kosova tregoi qetësi dhe menaxhoi më mirë momentet vendimtare, duke fituar setin e tretë me rezultatin 29:27 dhe duke siguruar fitoren e parë në këtë edicion të turneut. Ndeshja përmbylli paraqitjen pozitive të Kosovës në kampionat, i cili do të mbyllet me përballjen Shqipëri-Turqi në orën 17:00 në Ferizaj.