Kombëtarja e Kosovës në hendboll U20 përfundoi në vendin e tretë në Men's 20 EHF Championship I që u zhvillua në Prishtinë, duke fituar medaljen e bronztë pas një ndeshjeje dramatike kundër Italisë. Ndeshja përfundoi me rezultatin 26:25, ku golin vendimtar e shënoi Olsi Mulaj në sekondën e fundit të takimit. Italianët dominuan pjesën e parë, por Kosova u rikthye fuqishëm në fund për të siguruar fitoren dhe podiumin në këtë garë evropiane. Suad Pajaziti ishte më i dalluari me 9 gola nga 9 tentime, ndërsa Olsi Mulaj dhe Amar Muqolli kontribuan gjithashtu me gola, ndërsa portieri Olt Kabashi bëri 10 pritje vendimtare. Në këtë Evropian morën pjesë 12 ekipe, të ndara në dy nivele garash.