Në prag të ndeshjes historike të Kosovës kundër Sllovakisë në Bratislavë, presidenti i Federatës së Futbollit të Kosovës, Agim Ademi, ka dërguar mesazhe motivuese dhe ka falënderuar tifozët për mbështetjen e jashtëzakonshme. Ai theksoi se qytetarët e Kosovës dhe diaspora nga SHBA, Kanadaja, Skocia, Gjermania, Austria, Belgjika dhe vendet skandinave kanë udhëtuar për të mbështetur Kombëtaren, duke e cilësuar këtë si një dëshmi të atdhedashurisë dhe rrugëtimit drejt ëndrrës së madhe. Ademi e konsideron këtë përballje si sfidën më të rëndësishme në historinë e futbollit kosovar dhe shpreson që përkrahja e tifozëve do të ndihmojë skuadrën të arrijë një fitore historike. Ai falënderoi veçanërisht tifogrupin “Dardanët” dhe gjithë bashkëatdhetarët që janë pranë Kombëtares, duke u uruar lojtarëve fat dhe sukses në këtë takim vendimtar.