Kukësi dhe Luftëtari janë zyrtarisht skuadrat që bien në Kategorinë e Dytë për sezonin e ardhshëm, pasi humbën finalet e play-out përballë Bylis B dhe Sopotit. Ndeshja mes Kukësit dhe Bylis B në stadiumin e Vorës përfundoi 1-1 në kohën e rregullt dhe në minutat shtesë, ndërsa në seri penalltie Bylisi B fitoi 5-4, duke siguruar ngjitjen në Kategorinë e Parë. Në ndeshjen tjetër, Luftëtari humbi ndaj Sopotit pas barazimit 1-1 dhe penalltive, duke u detyruar të zbresë gjithashtu në Kategorinë e Dytë. Federata Shqiptare e Futbollit (FSHF) po përballet me një situatë të komplikuar, pasi nëse ekipi A i Bylisit bie nga Abissnet Superiore në Kategorinë e Parë, ekipi B i Bylisit duhet të rikthehet në Kategorinë e Dytë, duke krijuar paqartësi për zëvendësimin e skuadrave në ligë.