Kryeministri në detyrë i Kosovës, Albin Kurti, priti ekipin e xhudos që arriti suksese të rëndësishme në Lojërat Mesdhetare në Taranto, ku Laura Fazliu fitoi medaljen e argjendtë, ndërsa Akil Gjakova, Flaka Loxha, Fatjona Kasapi dhe Shpati Zekaj u stolisën me medalje të bronzta. Gjatë takimit u diskutuan rezultatet dhe analizat e para pas garave, si dhe hapat që duhet të ndërmerren në katër vitet e ardhshme për të përgatitur organizimin e Lojërave Mesdhetare “Prishtina 2030”. Kurti theksoi se përvoja e xhudos duhet të shërbejë si model për disiplinat e tjera sportive në vend, duke vlerësuar punën e palodhur, profesionalizmin dhe standardet e larta që kanë sjellë këto rezultate. Ai gjithashtu uron trajnerët dhe sportistët, duke theksuar synimin e institucioneve për të forcuar kulturën e rezultateve dhe standardeve në sportin kosovar.