Kryeministri i Kosovës, Albin Kurti, mori pjesë në ceremoninë “Laureatët e Vitit 2025” të organizuar nga Komiteti Olimpik i Kosovës, ku u nderuan arritjet më të larta sportive të vitit të kaluar. Ai vlerësoi përkushtimin, disiplinën dhe talentin e sportistëve, duke theksuar se çdo medalje është dëshmi e punës së palodhur dhe angazhimit të tyre. Kurti foli për zhvillimin e sportit në një sistem të qëndrueshëm, rritjen e investimeve kapitale dhe mbështetjen financiare, si dhe përgatitjet për Lojërat Mesdhetare Prishtina 2030 si një projekt zhvillimor shtetëror që kërkon bashkëpunim ndër-institucional. Në këtë event, xhudistja Distria Krasniqi u shpall “Sportistja e Vitit” për herë të gjashtë, ndërsa xhudisti Akil Gjakova mori çmimin “Sportisti i Vitit”, me urimet e kryeministrit për suksese të mëtejshme.