Llapi ka prezantuar zyrtarisht përforcimin e parë për sezonin e ri, sulmuesin e krahut të majtë Zani Nazifi, i cili ka nënshkruar kontratë deri në verën e vitit 2029. 21-vjeçari vjen pas një periudhe shumë të suksesshme me Shkëndijën e Haraçinës, ku realizoi 12 gola dhe dha 4 asistime në gjysmësezonin e fundit, duke ndihmuar skuadrën të ngjitet në Ligën e Parë të Maqedonisë së Veriut. Gjatë karrierës së tij, Nazifi ka fituar përvojë në klube të njohura maqedonase si Shkëndija e Tetovës, FC Shkupi dhe Besa Dobërdoll, duke u bërë një element i rëndësishëm në repartin ofensiv. Klubi i Llapit e konsideron këtë transferim si një shtesë cilësore dhe një investim afatgjatë për të forcuar skuadrën në sezonet e ardhshme.