Ndeshja miqësore mes Shqipërisë U-21 dhe SHBA U-21, e planifikuar për më 30 mars në Antalia të Turqisë, është anuluar për shkak të situatës së tensionuar në Lindjen e Mesme dhe çështjeve të sigurisë. Federata Amerikane e Futbollit njoftoi Federatën Shqiptare se nuk do të udhëtojë drejt Turqisë, duke bërë të pamundur zhvillimin e këtij dueli historik, i pari mes dy vendeve në këtë kategori. Shqipëria U-21 ka ende të planifikuar të luajë një ndeshje miqësore ndaj Japonisë U-21 më 27 mars në të njëjtin vend. Federata Shqiptare e Futbollit po shqyrton mundësinë për të gjetur një kundërshtar tjetër për ndeshjen e 30 marsit, duke u përpjekur të ruajë kalendarin e miqësoreve pavarësisht situatës së krijuar.