Mateo Kovacic, mesfushori kroat i Manchester Cityt, pritet të largohet gjatë kësaj vere pasi klubi i ka bërë të qartë se nuk bën më pjesë në planet e trajnerit Pep Guardiola. Pas një sezoni të vështirë dhe të shoqëruar me lëndime, 32-vjeçari ka humbur vendin në hierarkinë e mesfushës, ndërsa kontrata e tij ka ende një vit vlefshmëri. Situata është përkeqësuar edhe nga afrimi i pritshëm i Elliot Anderson nga Nottingham Forest, që do të detyrojë Cityn të lirojë hapësira në skuadër. Kovacic shpreson që paraqitjet e tij në Kupën e Botës 2026 me Kroacinë të zgjojnë interesimin e klubeve të tjera, megjithëse deri tani nuk ka oferta konkrete për të.