Mesfushori i ri i Barcelonës, Marc Bernal, ka hedhur poshtë spekulimet për një transferim te Manchester City, duke theksuar se dëshira e tij është të qëndrojë dhe të ndërtojë karrierën në klubin katalanas. 19-vjeçari është i fokusuar në përgatitjet parasezonale dhe nuk i kushton vëmendje zërave të merkatos, ndërsa çështjet e kontratës i ka lënë në dorë agjentit të tij. Bernal ndihet i gatshëm të marrë më shumë përgjegjësi në skuadër, sidomos pas lëndimit të Frenkie De Jongut, dhe shpreson të luftojë për një vend në formacionin titullar. Barcelona e konsideron atë një nga talentet më premtues të akademisë “La Masia” dhe e sheh si një pjesë kyçe të projektit afatgjatë të klubit.