Mario Mitaj, mbrojtësi i Kombëtares shqiptare dhe aktualisht lojtar i Al-Ittihadit në Arabinë Saudite, pritet të rikthehet te AEK-u i Athinës në afatin kalimtar të verës. Klubi grek ka shfaqur interes për shërbimet e tij, duke e parë atë si një përforcim të rëndësishëm për mbrojtjen, sidomos për sfidat në Ligën e Kampionëve sezonin e ardhshëm. Mitaj ka një kontratë deri në vitin 2028 me klubin saudit, ku ka fituar titullin dhe Kupën e Arabisë Saudite, ndërsa në sezonin aktual ka luajtur 33 ndeshje, duke shënuar një gol dhe dhënë tre asistime. Ai është rritur si futbollist te AEK-u dhe ka luajtur dy sezone me ekipin e parë para se të kalonte te Lokomotiva e Moskës dhe më pas në Lindjen e Mesme.