Në sheshin kryesor të Prishtinës u organizua një festë e madhe për Ditën Olimpike, ku mbi njëmijë nxënës nga shkolla të ndryshme morën pjesë në aktivitete sportive. Ngjarja u zhvillua më herët se data zyrtare e 23 qershorit, për t’u mundësuar fëmijëve të marrin pjesë para përfundimit të vitit shkollor. Presidenti i Komitetit Olimpik të Kosovës, Ismet Krasniqi, theksoi lidhjen e ngushtë mes sportit dhe arsimit, duke inkurajuar fëmijët të angazhohen në sport për të përmirësuar përqendrimin dhe shëndetin e tyre. Ndërsa Drejtori i Sportit në Komunën e Prishtinës, Granit Geci, u bëri thirrje të rinjve të largohen nga telefonat dhe të përkushtohen ndaj aktiviteteve fizike për një të ardhme më të ndritshme.