Milan Skriniar, kapiteni i Fenerbahçes dhe mbrojtësi i përfaqësueses së Sllovakisë, ka pësuar një këputje të pjesshme të muskulit në kofshën e këmbës së djathtë gjatë ndeshjes ndaj Nottingham Forestit në plejofin e Ligës së Evropës. Ai u zëvendësua në minutën e 26-të të takimit, ndërsa skuadra e tij u mposht 3:0 në shtëpi. Për shkak të këtij lëndimi, Skriniar do të mungojë për rreth një muaj dhe pritet të humbasë edhe ndeshjen gjysmëfinale të plejofit të Botërorit 2026, ku Sllovakia do të përballet me Kosovën më 26 mars në Bratislavë. Gjatë këtij sezoni, Skriniar ka luajtur 35 ndeshje për Fenerbahçen, duke shënuar dy gola dhe dhënë një asistim, ndërsa me përfaqësuesen e Sllovakisë ka 87 paraqitje dhe tri gola.