Alexander Sorloth, sulmuesi i Atletico Madridit me 20 gola këtë sezon, është në qendër të interesit të dy klubeve të mëdha italiane, Milanit dhe Juventusit, të cilët po kërkojnë të forcojnë sulmin e tyre për sezonin e ardhshëm. Juventusi ka nevojë për një qendërsulmues të ri për shkak të pasigurisë rreth të ardhmes së disa lojtarëve të tyre, ndërsa Milani synon të zgjidhë problemet në këtë pozicion me një numër 9 cilësor. Pavarësisht se nuk është titullar i rregullt te Atletico, Sorloth ka treguar aftësi të rëndësishme në shënim dhe lojë, duke qenë një alternativë e besueshme për trajnerin Diego Simeone. Përveç klubeve italiane, edhe Como dhe Everton janë të lidhur me sulmuesin 30-vjeçar norvegjez, duke e bërë këtë transferim një nga më të ndjekurit në merkato këtë verë.