Pas mbylljes së merkatos pa ndonjë transferim të madh në orët e fundit, Milani ka nisur të fokusojë vëmendjen te rinovimet e dy prej lojtarëve kryesorë të skuadrës, Adrien Rabiot dhe Strahinja Pavlovic. Të dy futbollistët kanë kontrata deri në vitin 2028, por drejtuesit kuqezi synojnë të shmangin çdo pasiguri duke zgjatur bashkëpunimin me ta për disa vite të tjera. Për Rabiotin, pritet një takim mes pronarit Gerry Cardinale dhe nënës së tij, e cila është edhe agjente, me synimin për një kontratë deri në vitin 2030 dhe një rritje page që mund të arrijë në 5 milionë euro në sezon. Ndërsa për Pavlovicin, negociatat janë në fazë të avancuar dhe pritet që ai të firmosë një kontratë të re që do ta mbajë te Milani deri në vitin 2031, duke e larguar nga interesat e klubeve të huaja.