Mircea Lucescu, trajneri legjendar i Kombëtares së Rumanisë, u shtrua në spital pasi humbi ndjenjat gjatë një stërvitjeje para ndeshjes miqësore ndaj Sllovakisë. Ngjarja ndodhi të dielën paradite, kur Lucescu po fliste me lojtarët dhe papritmas ndaloi së reaguar dhe u ul në karrige, duke pasur vështirësi në frymëmarrje. Federata e Futbollit të Rumanisë njoftoi se ai është në gjendje stabile dhe jashtë rrezikut për jetën, ndërsa diagnoza paraprake është “çrregullime të ritmit të zemrës”. Vetë trajneri deklaroi se është rikuperuar plotësisht, por do të qëndrojë në spital për kontrolle të mëtejshme.