Federata Shqiptare e Futbollit, nën drejtimin e Presidentit Armand Duka, priti në Tiranë Presidentin e Federatës Moldave, Leonid Oleinicenco, dhe një delegacion të gjerë nga institucionet sportive dhe qeveritare të Moldavisë për një vizitë tre-ditore. Fokus i vizitës ishte shkëmbimi i eksperiencave mbi zhvillimin e infrastrukturës sportive, duke u përqendruar në modelin shqiptar të ndërtimit dhe menaxhimit të stadiumit kombëtar “Air Albania”. Delegacioni moldav u njoh me qasjen e integruar ligjore, ekonomike dhe teknike që qëndron pas këtij projekti, i cili përfshin bashkëpunimin midis Federatës Shqiptare të Futbollit, institucioneve shtetërore dhe sektorit privat. Vizita përfshiu edhe një inspektim të stadiumit, i cili prej inaugurimit në vitin 2019 është bërë një shembull suksesi ndërkombëtar dhe ka ngritur standardet e futbollit në Shqipëri, duke e pozicionuar vendin si model pozitiv në rajon.