Të shtunën në stadiumin “Rexhep Rexhepi” në Drenas zhvillohet finalja e barazhit mes Dinamos së Ferizajt dhe Llapit të Podujevës, një ndeshje që pritet me shumë tension dhe emocione. Dinamo, e cila fitoi 2:0 ndaj Lirisë për të arritur në këtë finale, kërkon të shkruajë historinë duke siguruar ngjitjen në Superligën e Kosovës. Ndërkaq, Llapi, që përfundoi i teti në Superligë dhe për të dytin vit radhazi lufton për mbijetesë, synon të ruajë vendin e tij në elitë dhe të mbyllë sezonin me sukses. Të dy klubet kanë bërë thirrje për mbështetje maksimale nga tifozët, duke paralajmëruar një përballje ku çdo gabim mund të jetë fatal për fatin e tyre në kampionat.