Kombëtarja e Brazilit do të luajë pa Neymar edhe në ndeshjen e dytë të fazës së grupeve të Kupës së Botës kundër Haitit. Sulmuesi brazilian, i cili u rikthye në stërvitje vetëm së fundmi, nuk është përfshirë në listën e lojtarëve për këtë sfidë dhe do të qëndrojë në kampin bazë për të vijuar rikuperimin pas dëmtimit të pësuar. Trajneri Carlo Ancelotti dhe stafi teknik kanë vendosur të mos rrezikojnë shëndetin e 34-vjeçarit, duke preferuar që ai të arrijë gjendjen optimale fizike para se të rikthehet në fushë. Ende nuk ka një datë të saktë për rikthimin e Neymarit në lojë, por pritet që ai të jetë në dispozicion të skuadrës pas përfundimit të ndeshjeve në grupe.