Sot është hapur zyrtarisht Liga Universitare e Sporteve në ambientet e Fakultetit të Edukimit Fizik dhe Sportiv, duke bashkuar qindra studentë nga universitete dhe kolegje të ndryshme. Ceremoninë e hapjes e drejtuan dekani Florian Miftari dhe sekretari i përgjithshëm i Federatës së Sportit Universitar të Kosovës, Fidan Hamiti, i cili theksoi rëndësinë e sportit si një platformë bashkimi dhe zhvillimi për të rinjtë. Në këtë edicion garat përfshijnë gjashtë disiplina sportive, përfshirë futsall, ping pong, shah, volejboll në rërë, basketboll 3x3 dhe për herë të parë sportin e padelit, duke sjellë një risi të rëndësishme. Pas ceremonisë nisën ndeshjet e basketbollit 3x3, ndërsa përfaqësuesja e Ministrisë së Rinisë dhe Sportit, Donika Zogu, vlerësoi këtë iniciativë si prioritet të politikave shtetërore dhe përgëzoi organizatorët për angazhimin në promovimin e jetës aktive dhe vlerave të shëndosha mes studentëve.