Blinera Jaha, një prej volejbollisteve më të njohura të Kosovës, zhvilloi ndeshjen e saj të fundit me fanellën e Kombëtares, duke i dhënë fund një karriere të gjatë dhe të suksesshme që nisi në Akademinë “Drita” dhe u zhvillua në nivelin elitar evropian. Në një ceremoni të veçantë, e rrethuar nga bashkëlojtare, familjarë dhe dashamirës të sportit, ajo u nderua me mirënjohje nga Presidenti i Federatës së Volejbollit të Kosovës, Bahri Gjinovci, si dhe me një tortë simbolike me numrin 6, fanellën që mbajti gjatë gjithë karrierës. Federata dhe komuniteti sportiv falënderuan Jahën për përkushtimin, sakrificën dhe emocionet që dha për volejbollin kosovar, duke theksuar se emri i saj do të mbetet përgjithmonë pjesë e historisë së këtij sporti në vend. Edhe pse karriera e saj me Kombëtaren përfundon, ndikimi dhe trashëgimia e Blinera Jahës do të vazhdojnë të jenë të pranishme në volejbollin e Kosovës.