Më 26 mars në orën 20:45 do të zhvillohet ndeshja gjysmëfinale e play-off-it për Kampionatin Botëror mes Kosovës dhe Sllovakisë në stadiumin “Tehelne Pole”. Fanclubi Dardanët ka bërë thirrje për të gjithë anëtarët dhe ata që nuk janë anëtarësuar ende që të njoftohen për procedurat e pajisjes me bileta, të cilat do të jenë me rregulla strikte dhe me emrin e blerësit, duke kërkuar paraqitjen e letërnjoftimit. Interesimi për të qenë pranë kombëtares në Bratisllavë është shumë i madh, ndërsa Dardanët premtojnë përkrahje të fuqishme për futbollistët gjatë gjithë ndeshjes. Kjo sfidë konsiderohet si më e rëndësishmja në historinë e Kosovës dhe pritet të bashkojë shqiptarët në një kauzë të përbashkët për të parë vendin e tyre në majën e futbollit botëror.