Sot në orën 16:30 në stadiumin “Arena e Demave” zhvillohet ndeshja e dytë çerekfinale e Kupës së Shqipërisë mes Partizanit dhe Elbasanit. Takimi është shumë i rëndësishëm pasi të dyja skuadrat e konsiderojnë Kupën si rrugën më të shkurtër për të siguruar pjesëmarrjen në Kupat e Europës, duke qenë se rivaliteti në kampionat është i fortë. Në sezonin aktual, në kampionat Partizani nuk ka arritur të fitojë ndaj Elbasanit, por në ndeshjen e parë të Kupës fitoi me gol nga penalltia i Xhuliano Skukës. Trajneri i Partizanit, Oltijon Kërnaja, ka surprizuar me formacionin duke preferuar sulmuesin Kontreras nga minuta e parë në vend të Skukës, ndërsa Elbasani shprehet i bindur se do të përmbysë rezultatin për të kaluar më tej në kompeticion.