Në xhiron e 33-të të Superligës së Kosovës në futboll, vetëm ndeshja Prishtina e Re – Prishtina do të zhvillohet të mërkurën në orën 15:00 në Kampin Nacional të FFK-së në Hajvali, ndërsa të gjitha duelet e tjera do të luhen në vikend. Kjo përballje u shty për mesjavë për shkak të angazhimit të Prishtinës në Superkupën e Diasporës kundër Kosovës së Gjenevës në Zvicër, që zhvillohet të shtunën. Aktualisht, Prishtina e Re ndodhet në vendin e fundit me 28 pikë, ndërsa Prishtina është në vendin e katërt me 45 pikë, me vetëm katër xhiro deri në përfundim të sezonit. Përveç kësaj ndeshjeje, në xhiron e 33-të do të zhvillohen edhe duelët Drenica – Gjilani, Drita – Ballkani, Llapi – Dukagjini dhe Ferizaj – Malisheva.