Kombëtarja e Kosovës në futboll ka nisur përgatitjet për ndeshjen gjysmëfinale të play-off-it për Kupën e Botës 2026 kundër Sllovakisë, që do të zhvillohet të enjten mbrëma në Bratislavë. Dardanët mbajtën stërvitjen e parë në stadiumin “Fadil Vokrri” me intensitet të lartë dhe qasje profesionale, duke treguar vendosmërinë për këtë duel të rëndësishëm. Përzgjedhësi Franco Foda ka në dispozicion 19 futbollistë, ndërsa 6 të tjerë me ngarkesë më të madhe nga ndeshjet e fundjavës po punojnë në palestër me program të diferencuar. Stafi teknik po fokusohet në detaje taktike për organizimin e lojës, ndërsa stërvitja e dytë u zhvillua sot në mëngjes në të njëjtin stadium, duke vazhduar përgatitjet intensive për sfidën vendimtare.