Ekipi i xhudos së Kosovës ka zhvilluar një javë përgatitjesh intensive në Kampin Olimpik Stërvitor në Papendal të Holandës, një nga qendrat më të njohura të sportit elitar në Evropë. Nën drejtimin e kryemjeshtrit Driton Kuka dhe trajneres Majlinda Kelmendi, xhudistët kosovarë po punojnë për të përmirësuar formën dhe përgatiten për garat ndërkombëtare të ardhshme, duke synuar sukseset e mëdha përfshirë Lojërat Olimpike Los Angeles 2028. Në kamp morën pjesë sportistë si Laura Fazliu, Flaka Loxha, Fatjona Kasapi, Erza Muminoviq, Laurinë Gashi, Enise Zijade, Akil Gjakova, Dardan Cena dhe Shpati Zekaj. Federata e Xhudos së Kosovës u uroi atyre shumë suksese në vazhdim të përgatitjeve dhe në sfidat që i presin.